Miles de persoas esixen nas cidades e vilas do país “liberdade, igualdade e xustiza para o galego”

Compostela, 17 de maio de 2019.- Miles de persoas saíron esta mañá á rúa dunha ducia de cidades e vilas do país para esixir “liberdade, igualdade e xustiza para o galego”, nunha serie de mobilizacións simultáneas impulsadas por Queremos Galego. Marcos Maceira, voceiro da plataforma cidadá que integran máis de 700 entidades, recordou en Compostela que “a normalidade da lingua propia é mostra de cohesión social e desenvolvemento social e humano dun pobo” e asegurou que “Feixó ten que escoller entre ser leal a Galiza e promover toda a liberdade, igualdade e xustiza para o galego, ou a Casado, que pretende eliminar a pluralidade lingüísitica no Estado e prohibir o galego na administración”. Na opinión de Maceira, as mobilizacións da cidadanía deben “impulsar o cumprimento do artigo 5 do Estatuto de Autonomía de Galiza, que sinala que o galego é oficial e que os poderes públicos teñen a obriga de promovelo”. “Desde Queremos Galego e A Mesa”, finalizou, “cremos que Feixó debe optar pola lealdade a Galiza e abandonar a política de odio e desprezo polo galego”. “Pode comezar derrogando o decreto que prohibe o galego nas matemática, na física e química e na tecnoloxía”, concluiu.

“Máis que nunca, queremos galego”, recolle o manifesto deste 17 de maio, “porque a situación do galego é crítica mais a situación pode mellorar se se comezar por recoñecer o dereito a ser lingua visíbel, audíbel, e practicábel sempre, a respirar libremente en todos os espazos; porque o 22,7% das persoas de 4 a 15 anos non saben falar galego; porque existen límites de todo tipo, tamén legais, para empregalo con normalidade; porque o goberno galego non só non exerce o seu deber estatutario de defender a lingua, senón que actúa en contra, en ámbitos decisivos como a educación, a sanidade, a xustiza ou os medios de comunicación; e porque hai unha nova ofensiva xudicial e política contra o galego como a recente sentenza do Tribunal Supremo contra a ordenanza de normalización lingüística do Concello de Lugo”.

“Máis que nunca, queremos galego”, continúa, “para defender a liberdade, a democracia e a xustiza en Galiza; para que exista a posibilidade de vida normal en galego; para que non se vulneren os nosos dereitos lingüísticos que son dereitos humanos; para que xuízas, fiscais ou avogadas entendan e empreguen o galego”.  “Máis que nunca, queremos galego”, conclúe, “porque sen lingua non hai desenvolvemento social e económico, non hai liberdade posíbel, non hai igualdade, non hai xustiza. E sen liberdade, sen igualdade, sen xustiza non hai democracia”.

“A situación do galego non é irreversíbel, pódese modificar garantindo os tres principios: liberdade, igualdade e xustiza”, recorda o manifesto que se escoitou este mediodía nas nas principais vilas e cidades de Galiza.


10 anos de Queremos Galego

A plataforma cidadá celebra o seu 10º aniversario publicando un  vídeo no que recorda que foi, precisamente, en 2009 cando se produciu a primeira e única manifestación en contra do galego e mais cando o goberno da Xunta comezou a lexislar contra o galego. A sociedade galega respostou cunha manifestación na que participaron 100.000 persoas, a maior mobilización a favor dunha lingua en Europa. Concentracións e manifestacións dentro e fóra do país, manifestos, recollidas de sinaturas, unha folga xeral do ensino e mesmo o traballo no xulgados, que frutificou nunha sentenza do Tribunal Superior de Xustiza de Galiza que anula os principais artigos do decretazo contra o galego. O vídeo resumo fai un percorrido pola primeira década de vida de Queremos galego recorda que “as cousas só cambian se nos mobilizamos, porque as reivindicacións compartidas sempre dan froitos”.

Mobilizacións 17 de maio de 2019

As mobilizacións previstas para o 17 de maio son as seguintes (irase actualizando):

A Coruña
Praza de Galiza ás 12:00h

Santiago de Compostela
Alameda ás 12:00h

Ferrol
Praza Vella ás 12:00h

Carballo
Praza do concello ás 12:00h

Lugo
Praza Maior ás 12:00h

Burela
Praza da Mariña ás 12:00h

Monforte
Praza de España ás 12:00h

Ourense
Praza do Ferro ás 12:00h

Pontevedra
Praza da Peregrina ás 12:00h

Vigo
Manifestación ás 12:00h. Saída cruzamento da Vía Norte coa Rúa Urzáiz.

A Estrada
Praza do mercado ás 12:00h

Cangas

Praza do concello ás 12h

Lalín
Praza da igrexa ás 12:00h

Barcelona

Ateneu Roig (carrer del Torrent d’En Vidalet) ás 20h

QUEREMOS GALEGO VALORA COMO UN “EXITAZO” A MANIFESTACIÓN DO PASADO DOMINGO E ANUNCIA NOVAS ACCIÓN EN DEFENSA DO GALEGO

Carlos Callón: “A  enorme participación supón máis vento nas velas para continuarmos as mobilizacións en defensa da nosa lingua”

 A plataforma continúa a recoller sinaturas a favor do manifesto “Queremos galego na escola”, que xa foi asinado por persoeiros como Manuel Rivas, Luís Iglesia, Comba Campoy, Mónica Caamaño, Agustín Fernández Paz ou Xosé Lois “O Carrabouxo”

Rolda de imprensa 1-2-13

Rolda de imprensa 1-2-13

Santiago de Compostela, 1 de febreiro de 2013-. A plataforma cidadá Queremos Galego, composta por máis de 700 entidades sociais de todos os ámbitos, valorou hoxe a manifestación celebrada o pasado domingo 27 de xaneiro como un “exitazo da sociedade galega” a favor da súa lingua. Para a plataforma cidadá, o enorme apoio mostrado nas rúas de Compostela é unha mostra máis da ampla adhesión social á lingua galega, que se une ás masivas manifestacións dos últimos catro anos, que foron as maiores mobilizacións da historia de Galiza en defensa do seu idioma.

[youtuber youtube=’http://www.youtube.com/watch?v=R7MFGs58uxA’]

 “As mentiras de Núñez Feijóo teñen as pernas curtas”

A respecto do anuncio do goberno de Núñez Feijóo de recorrer ao Tribunal Supremo as sucesivas sentenzas do TSXG que deixan fóra da lei o núcleo central do mal chamado decreto do plurilingüismo, a plataforma sinala en primeiro lugar “como a mentira ten as pernas curtas”. Segundo declara o portavoz de Queremos Galego e presidente da Mesa pola Normalización Lingüística, Carlos Callón, “se Núñez Feijóo comezou dicindo que as sentenzas do TSXG lle daban a razón á Xunta, como é recorre unhas sentenzas que lle son favorábeis? É que nos toman por parvos?”

Ademais, segundo explica Callón, “é a primeira vez na historia da democracia, en todo o Estado español, que un goberno recorre aos tribunais en contra da súa propia lingua”. O portavoz de Queremos Galego tamén lembra que “o goberno de Núñez Feijóo vai malgastar diñeiro público nos tribunais en plena crise económica para atacar xustamente o que debería defender”. Ademais, salienta que “ataca o noso idioma, factor esencial da cohesión social, cando o precisamos tantísimo nestes tempos convulsos”.

A este malgasto de diñeiro público nos tribunais hai que lle sumar os millóns de euros que a Xunta queimou en libros de texto polo simple feito de estaren en galego e a intención do Goberno central de obrigar á Administración a pagar a educación privada do alumnado cuxos pais queiran garantir o suposto dereito á ignorancia na propia lingua, a través do proxecto de LOMCE, máis coñecida como Lei da Wertgoña.

Queremos Galego lembra tamén o estudo realizado pola Mesa pola Normalización Lingüística que sinala que nas cidades galegas o 95% da educación infantil se imparte exclusivamente en castelán, amparado polo decretazo contra o galego.

Calendario de mobilizacións

Despois do amplo respaldo social mostrado na manifestación do domingo, a plataforma cidadá continuará as accións en defensa do galego e está xa a traballar nun calendario de mobilizacións que inclúen a recollida de sinaturas a favor do manifesto Queremos Galego na Escola e actos en todas as comarcas de Galiza. Estas actividades culmirán coa convocatoria a toda a sociedade galega a participar o 17 de maio, precisamente o día no que se festexa o 150 aniversario da publicación de Cantares gallegos, primeiro libro escrito integramente en galego e que marca un fito “na recuperación da identidade de Galiza”.

O manifesto “Queremos galego na escola” conta xa con 4.500 sinaturas na súa adhesión en liña, que inclúen persoeiros destacados da cultura e sociedade galega, como a actriz Mónica Caamaño, a actriz e xornalista Comba Campoy, o escritor e crego Xaquín Campo Freire, a directora e dramaturga María Armesto, os escritores Antón Riveiro Coello, Agustín Fernández Paz, Paco Martín, Xesús Rábade Paredes, Xosé Lois García, Manuel Rivas, Lois Diéguez, as escritoras Helena Villar Janeiro e Marilar Aleixandre, o humorista Xosé Lois González, os músicos Magín Blanco, ou a cineasta Margarita Ledo. Este manifesto pódese descargar da web queremosgalego.org ou asinar on-line.