Para conseguir avances na normalización da lingua galega e garantir a súa presenza e oferta en todos os espazos e para todos os usos acadáronse e ratificáronse acordos e nacionais e internacionais. Entre eles destacan pola súa unanimidade a Declaración Universal dos Dereitos Lingüísticos (1996), a Carta Europea das Lingua Rexionais e Minorizadas (2001), o Plan Xeral de Normalización da Lingua Galega (2004) e a Lei Paz Andrade
No entanto, é evidente que estes acordos non se están a respectar, que as medidas que indicaban non se aplican e que neste tempo se chegou a lexislar en contra deles. O resultado deste desleixo é a aceleración da tendencia negativa no uso do galego e unha porcentaxe de incapacidade para falalo inédita na historia de Galiza.
Na plataforma cidadá Queremos Galego coidamos que é hora de reaxir e de que, como sociedade, asumamos a responsabilidade da que desertaron as institucións. Farémolo a través do Proceso social Lingua Vital coa participación de todas as entidades, colectivos e organizacións de Galiza que queren mudar o rumbo do galego.
O obxectivo deste proceso é avaliar o cumprimento dos acordos, identificar os obstáculos que impediron o seu cumprimento e, finalmente, propor accións concretas que comprometan a colectivos sociais e institucións na súa execución partindo dos acordos unánimes.
Comezaremos a través de grupos de traballo sectoriais, debatendo as propostas das diferentes entidades e colectivos participantes. Estes grupos definirán as propostas que se porán en común coa representación dos grupos e entidades sociais de ámbito nacional. Tamén convocaremos plenarios comarcais de Queremos Galego, para recoller achegas e trasladalas aos grupos de traballo.
Calquera colectivo poderá participar neles co único requisito de se inscribiren previamente nesta ligazón.
O resultado deste proceso será presentado publicamente e ás diferentes institucións implicadas.