Queremos Galego chama a mobilizarse o mércores 6 en Lugo en resposta á sentenza do Supremo contra a ordenanza de normalización lingüística

O TS rexeitou o recurso presentado polo Concello de Lugo contra a anulación parcial do TSXG da ordenanza de normalización lingüística aprobada por unanimidade no 2012

Compostela, 26 de febreiro de 2019.- A plataforma cidadá Queremos Galego, composta por máis de 700 entidades, vén de convocar unha concentración para o vindeiro mércores, día 6 de marzo, ás 12h fronte ao Concello de Lugo en mostra de repulsa á sentenza “ideolóxica” coa que o Tribunal Supremo (TS) rexeitou o recurso presentado polo Concello de Lugo contra a sentenza do Tribunal Superior de Xustiza de Galiza (TSXG) que anulaba parcialmente a ordenanza de normalización lingüística de Lugo, aprobada por unanimidade polo pleno da corporación en 2012 e ratificada polo pleno tras a sentenza do TSXG. A plataforma cidadá anima a sociedade galega a mobilizarse e manifestar o seu rexeitamento a unha aldraxe contra a dignidade do conxunto do pobo galego.

“A sentenza do TSXG ratificada agora polo TS”, explica Marcos Maceira, voceiro de Queremos Gaelgo, “ataca elementos da política de normalización da lingua galega completamente asumidos e apoiados maioritariamente polo pobo galego, como evidencia o feito de seren aprobados e acordados con total unanimidade das forzas políticas con representación institucional”. “Utiliza prexuízos ideolóxicos e políticos subministrados polo extrema dereita para agredir a lingua galega e as persoas que queren utilizala”, engade, “fortalecendo a consideración do galego como un idioma inferior”.

Entre estes elementos están a rotulación en galego das sinalizacións públicas, o carácter de lingua propia e oficial de Galiza e as súas institucións, o dereito a empregar a lingua propia con absoluta normalidade, a formación do funcionariado para que poida desenvolver as súas tarefas en galego ou que as subvención dunha administarción como a local, que ten a obriga de promover o galego, non poidan corresponderse con ese fin.

O TS pretende pór limites á oficialidade da lingua galega e impedir que poida manter calquera situación de igualdade respecto ao castelán. O TS estabelece uns máximos que o galego non debe traspasar baixo ningún concepto. Ilegaliza ademais unha posición social maioritaria no conxunto do pobo galego, a de que a lingua propia de Galiza é o galego, que é o noso principal elemento de identidade colectiva e que se atopa nunha absoluta situación de desprotección, aínda cunha lexislación que no mellor dos casos non se aplica e se vulnera constantemente. O mesmo tribunal non actúa contra as máis de 500 disposición legais que garanten a presenza absoluta do español e sitúan o galego en situación de inferioridade.

A sentenza avalada polo TS ponlle o carimbo de legalidade e lexitimidade á discriminación de usuarias e usuarios de servizos públicos privatizados por razón de lingua, ao primar o suposto dereito de descoñecemento do galego por parte das empresas emprestadoras de servizos á administración municipal fronte ao dereito a empregalo e ser atendido en igualdade de condicións por parte das e dos cidadáns. Este aspecto contravén ademais o contemplado no parágrafo 3 da Carta europea das linguas rexionais e minorizadas, que sinala o compromiso de “garantir que as linguas rexionais ou minorizadas se empreguen na prestación dun servizo” tanto polas autoridades administrativas como “polas persoas que actúen no seu nome”.

“Con esta sentenza o TS e o TSXG renegan de ser de Xustiza”, insiste Maceira. “Que xustiza hai nunha sentenza que pretende manter a exclusión histórica do galego, a súa invisibilización e mantela inaudíbel e invisível na administración local e en todos os servizos que ofrece a través de empresas privadas?”. “A maioría das galegas e galegos, falantes ou non de galego”, afirma, “queren a súa lingua e queren que a administración actúe para repola e rehabilitala, como pretendía facer minimamente o Concello de Lugo a través da ordenanza” e lembra que “foi aprobada por unanimidade en correspondencia coa posición manifestada por todas as forzas políticas ao aprobaren o Plan xeral de normalización da lingua galega”.

O TSXG deixa clara a liberdade para a administración municipal utilizar o galego sempre que se manter como lingua secundaria e que non se pretenda un mínimo estatus de igualdade. “Esa é a visión que teñen de Galiza e do galego”, indica Maceira. “Que liberdade hai de empregar o galego se as empresas concesionarias da administración non teñen que ofertala? A única liberdade que vén de recoñecer o TS é a destas empresas para excluír aos falantes de galego de servizos públicos”.

Embora a lexislación e acordos favorábeis á lingua galega sexan poucos e limitados, a vontade xeral por repor, rehabilitar e normalizar o noso idioma, fica claramente reflectida en textos como     o Estatuto de autonomía de Galiza, a Lei de normalización lingüística, a Lei de uso do galego como lingua oficial polas entidades locais, o Plan xeral de normalización da lingua galega, e mesmo tratados internacionais como a Carta europea das linguas rexionais e minorizadas, ratificada polo Estado Español en 2001, ou outros acordos como a Declaración universal de dereitos     lingüísticos.

Autobuses 17 de maio 2018

Horarios, prezos e paradas dos autobuses para a manifestación do 17 de maio de 2018. En galego día a día

Iranse actualizando cada día

A Coruña

Saída desde a Praza da Palloza ás 10:15 e terán unha parada diante de Seat Marineda (na Avda. Alfonso Molina) ás 10:30
Prezo normal: 5€. Persoas desempregadas e estudantado: de balde
Para poder facilitar a xestión dos buses habilitamos un formulario on line ou ben chamando ao teléfono 981.169.293 de 9:30 a 13:30 e de 17 a 20 horas

Lugo

Saída ás 10:00h diante do Edificio Sindical, na Ronda da Muralla
Prezo: 5€. Nenas e nenos de balde
Para anotarse chamar ao teléfono 982.225.812

Ourense

Saída ás 10h do parque de San Lázaro
Prezo: 10€ xeral – 5€ estudantes
Para anotarse chamar aos teléfonos 666.162.330 ou 646.772.568
Data límite o 14 de maio ás 20h

Pontevedra

Saída ás 10:30h desde o pavillón dos deportes
Prezo: de balde
Para anotarse enviar correo a pontevedra@bng.gal, pontevedra@galizacig.gal ou chamando ao 986.866.205 ou 986.861.582

Vigo

Saída ás 10:00h desde o local da CIG, na rúa Gregorio Espino.
Prezo: 5€
Para anotarse chamar ao teléfono 986.827.900 até o 15/05/2018

O Morrazo

Cangas
Saída ás 10:15h desde a estación de autobuses
Prezo: 5€. Estudantes e persoas desempregadas de balde
Para anotarse chamar ao teléfono 986.302.987 até o 11/05/2018

Moaña
Saída ás 10:30h desde A Xunqueira
Prezo: 5€. Estudantes e persoas desempregadas de balde
Para anotarse chamar ao teléfono 986.302.987

Ferrolterra

Narón
Saída ás 10:00h
Para anotarse chamar ao teléfono 981.358.750 ou 981.364.058

Ferrol
Saída ás 10:30h desde a Avenida de Esteiro desde o local da CIG
Para anotarse chamar ao teléfono 981.358.750 ou 981.364.058

A Mariña

Saída ás 8:30h da estación de autobuses de Ribadeo
Prezo (adultos): 5 €
Para apuntarse chamar ao 982.140.654, 982.581.861 ou ao 605.377.317

A Barbanza

Ribeira
Saída ás 10:00 h desde a estación de autobuses
Prezo: de balde
Para anotarse chamar ao teléfono 698.167.003 de 9:30h a 13:30h e de 16:30 a 20:30h

A Pobra do Caramiñal
Saída ás 10:15h desde a alameda
Prezo: de balde
Para anotarse chamar ao teléfono 698.167.003 de 9:30h a 13:30h e de 16:30 a 20:30h

Boiro
Saída ás 10:30h desde a Praza do Concello
Prezo: de balde
Para anotarse chamar ao teléfono 698.167.003 de 9:30h a 13:30h e de 16:30 a 20:30h

Rianxo
Saída ás 10:50h desde a parada de bus do peirao
Prezo: de balde
Para anotarse chamar ao teléfono 698.167.003 de 9:30h a 13:30h e de 16:30 a 20:30h

Costa da Morte

Saída ás 10:00h desde a estación de autobuses de Cee
Para anotarse chamar ao 981.745.266

Baixo Miño

A Guarda
Saída ás 9:25h desde a alameda
Prezo: 5€. Estudantes e persoas desempregadas de balde
Para anotarse chamar ao teléfono 986.610.465, no 616.090.632 ou baixominho@bng.gal até o 16/05/2018

O Rosal
Prezo: 5€. Estudantes e persoas desempregadas de balde
Para anotarse chamar ao teléfono 986.610.465, no 616.090.632 ou baixominho@bng.gal até o 16/05/2018

Tomiño
Prezo: 5€. Estudantes e persoas desempregadas de balde
Para anotarse chamar ao teléfono 986.610.465, no 616.090.632 ou baixominho@bng.gal até o 16/05/2018

Tui
Prezo: 5€. Estudantes e persoas desempregadas de balde
Para anotarse chamar ao teléfono 986.610.465, no 616.090.632 ou baixominho@bng.gal até o 16/05/2018

O Porriño

Mondariz
Saída: 9:30h desde garaxe Barros
Prezo: 5€. Persoas desempregadas e estudantes de balde
Para anotarse chamar ao teléfono 986.337.263

Ponteareas
Saída: 9:45h desde as piscinas
Prezo: 5€. Persoas desempregadas e estudantes de balde
Para anotarse chamar ao teléfono 986.337.263

O Porriño
Saída: 10:00h desde o pavillón dos deportes
Prezo: 5€. Persoas desempregadas e estudantes de balde
Para anotarse chamar ao teléfono 986.337.263

Queremos Galego convoca manifestación o 17 de maio baixo o lema En galego día a día

Reivindicarán o esforzo de miles de persoas e colectivos para normalizar a lingua fronte ao 155 lingüístico da Xunta

Marcos Maceira “É o pobo galego quen mantén a lingua viva, en solitario, e quen exerce as obrigas da Xunta de Galiza e coa mobilización diaria consegue avances”

Queremos Galego
Santiago de Compostela, 23 de abril de 2018-. A plataforma cidadá Queremos Galego, composta por máis de 500 colectivos sociais de todo tipo, anunciou hoxe a convocatoria dunha multitudinaria manifestación para o 17 de maio baixo o lema “En galego día a día”. A manifestación percorrerá as rúas de Santiago de Compostela saíndo ás 12h da Alameda.

O anuncio foi realizado hoxe polo voceiro de Queremos Galego, Marcos Maceira, acompañado de membros da Xestora da plataforma cidadá, que sinalaron que ao longo dos próximos días e até a data da convocatoria desenvolveranse diversos actos nas comarcas galegas para informaren da convocatoria. Na web www.queremosgalego.gal  indicaranse os horarios e prezos dos buses que se porán a disposición de todas as persoas que desexaren acudir a Compostela a impulsar a plena normalización da lingua galega.

En galego día a día

Queremos Galego reclamará este 17 de maio o día a día das persoas que fan que a lingua viva mais ás que se lles exixe un esforzo que non terían que facer se quixeren utilizar unha lingua plenamente normal.

Este día a día é que consegue manter viva unha lingua que non só non conta con amparo institucional senón que recibe desamparo e agresividade sistemática.

Co lema “En galego día a día” a plataforma cidadá pretende reivindicar o apoio social crecente á lingua galega que contrasta coa actitude da Xunta de Galiza que mantén un 155 lingüístico de facto. Segundo indicou o voceiro da Plataforma, Marcos Maceira, “en Galiza é o propio goberno galego, co presidente Feixó á cabeza, quen actúa como un vulgar delegado do goberno español, renegando das funcións que lle dá o estatuto de autonomía e da alta representación de Galiza que debería exercer”. Como consecuencia, sinalou, “o galego é o único idioma oficial do Estado que diminúe en falantes e carece de apoio do seu propio goberno”.

queremos_galego_17M

O 155 lingüístico de Feixó

“O  155  de Feixó anula as competencias e a capacidade da Xunta de actuar e lexislar a favor do galego, e polo tanto todos os artigos ao respecto do Estatuto, a LNL,  ou acordos parlamentares unánimes como o PXNLG. En Galiza nin se aplica nin se aproba ningunha lexislación a favor do galego mais si se aplican as máis de 500 disposicións legais que obrigan ao uso do español en diferentes ámbitos”.

“Existe unha sociedade que actúa día a día para repor e normalizar a lingua galega, a través de centos de colectivos e entidades e en ámbitos moi diversos” e que estarán representados como todos os anos no acto final da manifestación. Indicou tamén que “son moitas as persoas que sen falar galego aspiran a vencer as barreiras de todo tipo que lle impeden o mínimo de seguridade precisa para facelo e que demandan mudanzas que faciliten a súa instalación na lingua propia de Galiza”.

“É o pobo galego quen mantén a lingua viva, en solitario, e quen exerce as obrigas da Xunta de Galiza e coa mobilización diaria consegue avances. Grazas ao activismo social o galego conseguiu pequenas vitorias que dan mostra forza do pobo galego, mais tamén de todo o que falta por avanzar”.

Como exemplo citou as compañías de seguros que comezan a cumprir a lei e ofertar pólizas en galego; compañías de telefonía móbil que se obrigadas a rectificar anuncios de desaparición das opcións en galego; ou transnacionais que modificaron regulamentos internos que impedían o uso do galego, non porque actúe a administración senón por acción da sociedade. “Canto mellor estaría o galego se a administración actuase minimamente?”, perguntouse.

Propaganda fronte ao día día

Porén por parte do goberno galego a única actuación é a propaganda coa anuncio dun novo Plan, esta vez para a mocidade. Maceira instou á Secretaría Xeral de Política Lingüísitica e ao Presidente Feixó, a comezar por eliminar as prohibicións de uso do galego e a consideración como lingua extranxeira no ensino.